गजल

- डा. ऋषि बस्ताकोटी

के भएन जिन्दगीमा, धेरै कुरा जोडेको छु ।
ओछ्याएर सिंगै धर्ति, पूरै आकाश ओढेको छु ।

कहिले फूल फुल्यो यता, कहिले झारै फुल्यो,
अध्यारोमा झार भन्दै, कैयौं फूल गोड़ेको छु ।

उकालो नि हिंडे धेरै, ओरालो नि झरें उस्तै,
गन्तव्यमै पुग्न लाग्दा, कति पाइला मोडेको छु ।

तिमीलाई ढाट्या भए, आफैँ भन्न नपाउँ,
आफ्नै बाचा-कसम भने, घरी घरी तोडेको छु ।

हिसाव पछि गरौंला नि, अहिले यत्ति भैगो,
के के पाउन जिन्दगीमा, कता के के छोडेको छु ।

प्रकाशित मिति : प्रकाशन मिति : शुक्रबार, 26 जेठ, 2074

लेखकका अन्य रचनाहरु