गीत

- हेमन्त परदेशी

न त देखेँ जूनमा तिम्लाई न त भेटेँ शीतमा
न त रेटेँ सारङ्गीमा न त लेखेँ गीतमा
बिना कारण दोष दियौ दाग मैले कहाँ लाएँ?
आफ्नै जस्तो मन ठानेर आज आफै धोका खाएँ

न त रोजेँ फूलमा तिम्लाई न त खोजेँ पातमा
न त सोधेँ दिनमा तिम्लाई न त सोचेँ रातमा
बिना कारण शंका गर्‍यौ जाल मैले कहाँ थापेँ?
तर्किएर बरु उल्टै मैले आफ्नो पाइला नापेँ

न त भाकेँ मनमा तिम्लाई न त राखेँ साथमा
न त तारेँ भंगालोमा न त छाडेँ घाटमा
बिना कारण रीस पोख्यौ गल्ती मैले कहाँ गरेँ?
बदनामीको झ्याली पिट्यौ बेकसुर जालमा परेँ

प्रकाशित मिति : प्रकाशन मिति : शनिवार, 21 श्रावण, 2068

लेखकका अन्य रचनाहरु