मान्छेको भविष्य

- बैद्यनाथ उपाध्याय

दिन रात
भ्याइ नभ्याइ व्यस्त रहने
दुनियाका वैभवशाली
शहरहरू पनि
अहिले एकान्तमा
सुस्ताई रहेकाछन।

यस बेला
त्रस्तमान विश्व
कोरोनाको सूतक बारिरहेको छ
हामी स्तब्ध छौं
एकाएक
कस्तो कोल्टे फेऱ्यो
यो समयले...

धराशायी छ
मान्छेले रचाएका
सुख- सुविधा र साधनहरू
व्यक्ति व्यक्ति देखि
टाढिनु पर्ने
'सोसल डिस्टिंसन' को
कस्तो जमाना आयो।

मान्छेको सोच विचारहरू
सबै क्वारान्टाइनमा बसेको
यो विकट घडीमा
शोक स्तब्ध
अन्तर्मुखी भएको छ
मान्छेको भविष्य !


असम

प्रकाशित मिति : प्रकाशन मिति : वुधबार, 17 बैशाख, 2077

लेखकका अन्य रचनाहरु