बजगाईंको "दाइबुचु" जापानमा सार्वजनिक

बेलायत निवासी साहित्यकार कृष्ण बजगाईंको जापानसम्बन्धी नियात्रा सङ्ग्रह ‘दाइबुचु’ काे गत सोमबार जापानकाे टोकियोमा भव्य विमोचन गरियाे ।

अनेसास जापान च्याप्टरको आयोजनामा शिनओकुबोस्थित नेपाली मुराहलमा सम्पन्न कार्यक्रम नेपाल हाइकु केन्द्रका अध्यक्ष प्रा. रामकुमार पाँडेको प्रमुख आतिथ्यमा भयाे । नियात्राकार कृष्ण बजगाईं, एनआरएनए जापानका अध्यक्ष देवीलाल भण्डारी, साहित्यकार श्याम अतिथि सेढाई, अनेसास केन्द्रीय कार्यसमिति वरिष्ठ उपाध्यक्ष प्रकाश पौडेल ‘माइला’ विशेष अतिथि थिए । अतिथिहरूमा अनेसास पूर्व अध्यक्ष बेलु क़ाज़ी थापा, अनेसास पूर्व अध्यक्ष आलोक चालिसे, अनेसास जापान सल्लाहाकार पुस्करजंग थापा, अनेसास जापान सल्लाहकार सुस्मा ओमाता, डा भुपालमान श्रेष्ठ, गायक रामकृष्णबम मल्ल, कुमार सिम्खडा, भगवती उप्रेती, माता रमा खड़का, हरिश इसान ग्रीष्मा पौडेल लगायत थिए ।

कार्यक्रमका प्रमुख अतिथि प्रा.पाँडेले यात्रा र हाइकुको समिश्रणले बनेको ‘दाइबुचु’ जापानी साहित्यको हाइबुन शैलीमा लेखिएको पुस्तकमा दर्जनौं हाइकु रहेको र यो नौलो प्रयोग भएको बताए । विमोचित कृतिका बारेमा बोल्दै अनेसास जापानका पूर्व अध्यक्ष आलोक चालिसेले जापानको साहित्य र संस्कृति बुझाउन पुस्तकले ठुलो सहयोग गर्न सक्ने बताए । त्यस्तै बेलुकाजी थापाले ‘दाइबुचु’ पढ्दा जापान घुमेको अनुभूति हुने बताउँदै पुस्तकलाई शुभकामना दिए । त्यस्तै एनआरएनए जापानका अध्यक्ष देवीलाल भण्डारीले जापानका बारेमा आफूले थाहा नपाएका धेरै कुरा यो पुस्तकले समेट्न सकेकोमा खुसी व्यक्त गरे । उक्त अवसरमा नवनिर्वाचित एनआरएनए अध्यक्ष देवीलाल भण्डारीलाई पुष्पगुच्छा र खादाले सम्मान गरिएको थियो । अनेसास केन्द्रीय कार्यसमिति वरिष्ठ उपाध्यक्ष प्रकाश पौडेल ‘माइला’ ले पुस्तक निकै खोजमूलक रहेको र जापान जान्न र बुझ्न चाहनेहरूका लागि पुस्तकले धेरै कुरा खोलेको बताउँदै शुभकामना दिए ।

लेखक कृष्ण बजगाईंले ‘दाइबुचु’ अनुसन्धानमूलक नियात्रासङ्ग्रह भएको बताउँदै आजबाट पुस्तक सबैलाई सुम्पँदै प्रतिकृयाको आश राखेको बताए । कार्यक्रममा डा. भूपालमान श्रेष्ठ, केबी पारखी, रामकृष्णबम मल्ल, हेमन्त गिरी, ध्रुव बन्जाडे, गृष्मा पौडेल, भगवती उप्रेती, राजेन्द्र पौडेल, गङ्गा गगन, दीपा घिमिरे, अरुण पौडेल, गिरिजा गैरे, सुस्मा ओमाता, हरिश इशान आदिले आआफ्ना रचना वाचन गरेका थिए । अन्तर्राष्ट्रिय नेपाली साहित्य समाज जापान च्याप्टरका अध्यक्ष दीप पाठकको सभापतित्वमा सम्पन्न कार्यक्रम संस्थाका महासचिव अरुण पौडेलले सञ्चालन गरेका थिए ।

Thursday, September 26, 2019