मेरो मातृभूमि हो
पितृभूमि पनि हो
र
मेरो क्रीडा भूमि हो ।
अन्नदाता, दौँतरी र सहपाठी
साथी, नातेदार र दाजुभाइ
सबै हो पहाड ।
मेरो गाउँमा
सबैभन्दा शक्तिशाली थियो त
पहाड नै थियो
बहादुर, हकी र इमान्दार पनि ।
यदि यो पहाडको
कुनै प्रतिद्वन्द्वी थियो भने,
केवल हावामात्र रहेछ ।
युरोपतिरको चिसो हावा,
क्यानडा र अमेरिकी हिउँमा रङ्गिएको,
अष्ट्रेलियामा कङ्गारुले सास फेरेको ,
चिसो हावा ।
यसैगरि
अफ्रिकी वालुवामा पेलिएको,
खाडीको रसेटोबाट निस्किएको,
तातो हावा ।
मेरो पहाडका असली दुस्मन यिनै हावा थिए
यहुदीहरूको दुस्मन हिटलर जस्तै
त्यसैले लाग्छ,
हावा एकमात्र क्रुर शासक हो ।
जब पिरो धुवाँ बोकेर
हावाले शासन गर्न थाल्यो
शान्त पहाडलाई उकुसमुकुस बनायो
पहाडले हावाको प्रहार सहन सकेन
पहाडले हावाको अत्याचार सहन सकेन
पहाड अचानक बिरामी भयो ।
आजभोलि पहाड दुब्लाउँदै गएको छ
पहाडलाई अरुचि भएको छ
पहाड निदाउन छोडेको निकै भयो
ऊ सधैंजसो चिन्तित देखिन्छ
उसको शरीरमा
हाड र छाला मात्र देखिएको छ ।
सायद
अझै उपचारको उचित व्यवस्था नभए
एकदिन मेरो पहाडको
दु:खद अवसान हुनेछ ।
लाग्छ, अझै बितिसकेको छैन
समय केही बाँकी छ
मेरो पहाडले
उचित उपचार पायो भने
ऊ अझै बाँच्न सक्छ ।
चितवन ।
समकालीन साहित्य