तपाईं सँधैकालागि जानुभएको खवरले स्तब्ध बनायो ।
न कसैले तन भुलेको सुनाए
न कसैले मन दुखेको सुनाए
सुनाए त सुनाए, अर्ली इन द मोर्निङ
तपाई जानुभएको खवर सुनाए ।
काका,
के तपाईं साँच्चै जानुभएकै हो ?
किन सुटुक्क जानुभएको ?
बेँसी झर्दा झै हात हल्लाएर
लागियो है ..! भन्दै जानुभएको भए हुन्थेन ।
००
तपाईंसँग भएको विकासप्रतिको मोह, दृढ इच्छा,
उत्साह र जाँगर उस्तै छ कि अब सकियो काका ?
समाजमा हुने अन्याय विरुद्ध जुरुक्क उठ्ने तपाईका मुठ्ठी
अझै उठ्दैछन् कि छाडे काका ?
मान्छे अलि अघिकै भएपनि
कृषिमा नयाँपन खोज्ने तपाईंको उर्जा
पुस्तान्तरण गर्न भ्याउनु भयो के ?
जिन्दगीभरी उदास नदेखिएको त्यो मन कति उदाहरणीय थियो,
तपाईंको खुल्ला हृदय र सहयोगी भावना
दोस्रो पुस्तामा सेयर गर्न भ्याउनुभयो के त काका ?
००
तपाईंले सँधै सुनाउने गाउँका चौतर्फी खवरहरु
अब कसले सुनाउँछ ?
एकैपटक सल्लेरीदेखि अमलेसम्म र
लोख्रुम्बादेखि लुङसुङदाङ र चुक्रुम्बासम्मका खवरहरु
अब कसले सुनाउँछ ?
गाउँका तमासे युवाहरु झगडा गर्दा कसले मिलाउँछ ?
चौथीका नाममा धान,मकै र चियाका बुट्टा काट्नेहरुलाई
अब कसले खवरदारी गर्छ ?
बेँशी खेतको कुलो सोर्ने उर्दी कसले गर्छ ?
तपाईंको अभावमा सिंगो गाउँ निरीह बनेको छ काका ।
००
शुक्रवारेको चिसो डाँडामा
‘गासा बाबैको तातो कटेज’ सम्झिएर आउने
दिनभरीका बटुवालाई आफ्नै हातले रोपेको
आफ्नै बारीको अर्गानिक हाते पत्तिको स्वाद
अब कसले चखाउँछ ?
बाटो खन्दा, मन्दिर, पुल पुलेसा बनाउँदा
ढुंगा फोर्दा, मुढा चढाउँदा र विटा बोक्दा
त्यो कम्मरमा बाँध्ने हरियो पटुकी अब कसले बाँध्छ काका ?
गाउँ, शहर र सडकको अधुरो विकासलाई पूर्णता दिन
हातेमालो गर्नुपर्छ है..! भन्दै युवाहरुलाई कसले सुझाउँछ ?
प्रतेक दशैंको पूर्वसन्ध्यामा बाटो खन्ने उर्दी गर्दै
जोरधारामाथिबाट ठूलो स्वरमा अब कसले बोलाउँछ काका ?
००
हामी मधेश झर्ने विहान
अग्लो थाङ्ग्रामाथिको चोपसरिको हरियो काँक्रो,
काब्रामाथिको स्कुस, डिलमाथिको अकबरे र
महसरीको अलैँचीको पोको अब कसले बाँधिदिन्छ काका ?
कसैले हाम्रो परिवारमाथि नराम्रो बोल्यो मात्रै भनेपनि
तपाईं जुरुक्क उठेर कठालो समाउन पुग्नुहुन्थ्यो ,
के तिनीहरुलाई ठेगान लगाएरै जानुभएको हो काका ?
00
अँ हँ, तपाईं जानुभएको मलाई पटक्कै विश्वास छैन,
यदि साच्चै हो भने
यो भन्दा त्यो लोक कति टाढा रहेछ काका ?
सुटुक्क इनबक्समा लेख्न मिल्दैन ?
तपाईंको यो यात्रा डिष्ट्रेन्सको (की.मी.) मात्रै भएपनि पाउँ है काका
प्लिज, मलाई तपाईंको अन्तिम यात्राबारे एउटा रिपोर्ट गर्नुछ । ।
(स्व. काकाप्रति समर्पित ।)
समकालीन साहित्य