18 वर्षदेखि निरन्तर
समकालीन साहित्य
समकालीन साहित्य
बैंशालु युवतीसँग छिल्लिएझैं
उत्ताउलिएर मान्छेहरु
समयको धारसँग खेल्छन्
धार एउटा लक्ष्मण रेखा हो
समयको कठघरामा उभिएको मान्छेहरु
त्यसमाथि टेकेर वारपार गर्दछन्
अर्जाप्छन् हतियारहरु
समयको धारमा ।
शिरोच्छेदन गर्दछन् समयको
अनि घण्टा, मिनेट र सेकेण्ड छाडेर
माइक्रो सेकेण्डको हिसाव गर्दै दौडन्छन्
घडीको वरिपिर ।
जब समयको धारले
रेट्दै ल्याउँछ तिनीहरुलाई
छाडिन्छन् मझधारमा
र झुण्डिन्छन् घडीको पेण्डुलुम झैं
समयको भित्तामा ।
तर पनि पाखण्डी मान्छेहरु हार्न मान्दैनन्
धारलाई जित्न टाउकोले टेकेर हिँड्छन्
अतिरिक्त समयमा
तव हरेक दिन मृत्युत्सव मनाउँछन् धारहरुले
प्रत्येक माईक्रो सेकेण्डमा ।