14 वर्ष देखी निरन्तर
समकालीन साहित्य

तिहार र देश

कविता विक्रम सुब्बा October 10, 2009, 6:57 am

बन्दुक धेरै भुकेकाले कागहरू

अचेल गाउँ-घरतिर आउँदैनन्

यसपाली त तस्बिरै राखेर

काग-पूजा गर्न छोरीलाई भन्नु पर्ला

धेरै भइसक्यो वस्तुभाउहरू गोठमा

असुरक्षाको नुन-पानी खाएर दुब्लाएका छन्

कोरली-बाच्छीहरू बम-गोलाले सोत्तर भएका छन्

गाईको सट्टा यसपालि

कूश राखेरै लक्ष्मी पूजा गर्न

श्रीमतीलाई भन्नु पर्ला

चाढ आइसक्यो केही ग-या छैन

ज्यान जोगाउँदै केही भ्याएको छैन...

हेडमास्टरको कुर्सीछेउमा

अपहरणको छाँयाले हात लम्काउँछ

बेरोजगार मृत्यु काम खोज्दै

मर्निङवाकमा सबेरै भेटिन्छ

चुलाहरूमा त्रासको आगोले

सेल-रोटीहरु पाक्न नसकेर धुवाँउँदैछन्

देशवासी हो ! होसियार !!

मुलुकको लम्पसार मानचित्रको शिरमा अचेल

नयाँ नयाँ शिर्षकहरू दाउ खोज्दैछन्

तिहार त गए पनि अर्को वर्ष फेरि आउला

तर एकचोटि कतै गएपछि फर्केर आउँदैन देश ।

लेखकका अन्य रचना पढ्न यहाँ क्लिक गर्नुहोस ।