14 वर्ष देखी निरन्तर
समकालीन साहित्य

संगीतबिहिन मौन जुवारी

कविता आचार्य प्रभा October 17, 2009, 9:08 am

ब्यर्थ बिचारको उहापोहमा

मस्तिष्क खर्चेर हामी

सदा शीतयुद्धमा लडिरहेछौँ

ता पनि.....

सकारात्मक निश्कर्षको

प्राप्ती छैन हामीलाई ,

अन्यौलमा भौँतारी रहेछौं

अकथित भावनाहरु मनभरी गुम्साएर

एकार्काका बिचारहरुसँग

असहमतिको सहिछाप गर्दै

मौन जुवारी खेलिरहेछौँ ।

कोही राजनीतिको रखवाला भएर

युद्धको धावा बोलिरहेछौँ

कोही धर्मको बिभाजनमा एकार्कालाई

बिभाजित गरिरहेछौं

कोही लिंगभेदको निहुंमा आफूलाई

अग्रणी बनाइ रहेछौं ,

कोही जातिबादमा

अन्धो बनिरहेछौँ ।

हो यो मौन जुवारीमा

न मादलको मीठो ताल छ,

न त सारंगीको स्वीकृतिको

मन छुने मीठो धुन छ

न त बाँसुरीको लय छ

फगत !यो जुवारी संगीतबिहिन छ

असमर्थन र अस्वीकृतिका शब्दहरु

ब्यर्थमा भरिएको छ

यो कण्ठबिहिन जुवारीमा

पोख्त संगीतकारको कमी छ

मीठो स्वरदिने गलाको

आवश्यकता छ

अनि सहि शब्दकारको खाँचो छ

यो मौन जुवारीमा ।

अमेरिका

लेखकका अन्य रचना पढ्न यहाँ क्लिक गर्नुहोस ।