18 वर्षदेखि निरन्तर
समकालीन साहित्य
समकालीन साहित्य
सँगसँगै चालेथ्यौं पाइलाहरु हामीले,
खै ! हिंड्दा हिंड्दै कहाँनिर ठेस लागेछ कि कुन्नि ?
म वैशाखी खोज्न थालें
तर तिमीले त नेटो काटिसकेछौ
एउटै ओढेथ्यौं च्यादर दुवैले
खै ! चिसो पस्न थाल्यो कताबाट च्यातिएछ कि कुन्नि ?
म जोडेर सिउन थालें
तर तिमीले त बर्की साटिसकेछौ
विश्वासको दियो जलाएका थियौं हामीले
खै ! दियो बल्न छाड्यो किन हो, तेल सकिएछ कि कुन्नि ?
म तेल खोज्न थालें
तर तिमीले त दियो नै फाँकिसकेछौं
प्रेमले सिञ्चित गरेथ्यौं जीवन दुवैले
खै ! सुख्खा देखिन्छ माया विश्वासमा खडेरी परेछ कि कुन्नि ?
म पानी खोज्न थालें
तर तिमीले त मुहान नै छेकिदिएछौ
काठमाडौं