अक्षरका आवाजहरु

कविता जयराम तिमल्सिना December 12, 2009, 9:50 pm

---

अमिलो अनुभूतिको छाँयानेर

अक्षरहरु लिगलिगकोट दौड

स्वतन्त्रताको धीत मार्ने

विचलित अधमरा तनहरु

तातो खरानी ताप्दै

अनन्त प्रतीक्षाका फूलहरुमा

दुखेरै माटोभरी बाँचिरहेछन् ।

एक अक्षरका कविताहरु

शालीनताहीन अवशेष

उज्यालो ओसिएका आँगनिमा

एउटा ह्दयको विचार

अवैध छक्का हानिन्छन्

अचुक रुग्ण वर्तमानमा

सत्य निषेध परम्पराबाट ।

एउटा अनिश्चित भय

संवेदना हराएका कथाहरु

खाली मझेरीको आश्रम

कालो वादल छोचोलेर

अनिकाल भरिन्छ पाथीमा

वाणीहीन अस्पष्ट जलप

चुहिएर रितिएको सजीवता ।

सकिसकेको छैन जीवन

आवाजसंगै आकृतिसंगै

सानो संकल्प लिएर

आगो र पानीका कथाजस्तै

चिच्च्याईरहे जागा नै रहे

अक्षरका एकहुल अवाजसंगै ।

लेखकका अन्य रचना पढ्न यहाँ क्लिक गर्नुहोस ।