कविताको रङ

कविता आर. आर. चौलागाईं December 31, 2009, 5:02 pm

---

कसैले कवितालाई

नीलो भाँडोमा राख्यो

र कविता नीलो हुन्छ भन्यो

कसैले कवितालाई

रातो भाँडोमा राख्यो

र कविता रातो हुन्छ भन्यो

कसैले कवितालाई

हरियो भाँडोमा राख्यो

र कविता हरियो हुन्छ भन्यो

कसैले कवितालाई

पहेँलो भाँडोमा राख्यो

र कविता पहेँलो हुन्छ भन्यो ।

यसै गरी क्रमशः

सबै जनाले कवितालाई

सेतो, कालो, खैरो इत्यादि भन्दै गए

र पाखुरा सुर्किन थाले

हुँदाहुँदा टाउको फोराफोर गर्न थाले ।

एकदिन मैले कवितालाई

खोलामा खेलिरहेको देखेँ

कविता नीलो पनि थिएन

कविता रातो पनि थिएन

कविता हरियो पनि थिएन

कविता पहेँलो पनि थिएन

र कविता सेतो, कालो, खैरो इत्यादि पनि थिएन

कविता थियो त खोला जस्तै थियो

खोलाको पानी जस्तै थियो

त्यहि दिनदेखि मैले थाहा पाएँ

कविता जुन भाँडोमा राख्यो त्यस्तै हुँदो रहेछ

कविता पानी जस्तै हुँदो रहेछ

कविताको रङ नहुँदो रहेछ ।

हेटौँडा, मकवानपुर

लेखकका अन्य रचना पढ्न यहाँ क्लिक गर्नुहोस ।