14 वर्ष देखी निरन्तर
समकालीन साहित्य

गजल

गजल डि.बी. जिरेल January 21, 2010, 7:34 am

छातीमा जडिरहने जुहार भनुँ कि सरताज भनुँ

मेरी प्राण प्रियारीलाई लैला भनुँ कि मुमताज भनुँ ।

बेसुरा–बेसुरा उनीबिना, सारा बज्ने बाजाहरु

उनीलाई मेरो सङ्गीतको, अदा भनुँ कि आवाज भनुँ ।

प्रभात आउँछ याद बोकेर, सन्ध्या जान्छ झल्का छाडी

दुई घडी जिउने जिन्दगीको, सार भनुँ कि राज भनुँ ।

भावनाको सागर तरी, सगर नाप्ने धोको मेरो

यात्राभरिको सङ्गिनी उनी, डुङ्गा भनुँ कि जहाज भनुँ ।

लाख जन्म लिएँ सायद, उनीसँग मिल्नलाई

मेरो तपस्या उनीलाई, कुरान भनुँ कि नमाज भनुँ ।

अल्झिएर कहीँकतै, गाह्रो यात्रा रोकेका बेला

अँध्यारो रविमा उज्यालो थप्ने, नुर भनुँ कि नाज भनुँ ।

जिरी ८, दोलखा

लेखकका अन्य रचना पढ्न यहाँ क्लिक गर्नुहोस ।