14 वर्ष देखी निरन्तर
समकालीन साहित्य

हामी आविष्कारक हौं अन्धकार युगको

कविता डा.ज्ञानू पाण्डे January 29, 2010, 11:19 am

‘फटाहाका गलामा माला सुहाउँदैन’

‘दुर्जनलाई सम्मान कहिल्यै गर्नु हुँदैन’

‘श्रोता बन्नु सधैं असल गुरुको’

‘खरावहरूको संगत गर्न हुँदैन’

पुर्खाले सिकाएका यी सत्वाणीहरू

सबै झूठो बनाइदिएकाछौं

विद्या बङ्गयाइदिएकाछौं

अर्थहरु सबै भत्काइदिएकाछौं

हामी सर्जक हौं नयाँ पाठको

गुरु हौं नयाँ अभ्यासको

बधाई दिन्छौं हामी आफैलाई

आविष्कारक हौं नयाँ नेपालको

उसै पनि क्षणभंगुर यो मानवचोला

झनै क्षणिक बनाइदिएका छौं

मर्नलाई काल पर्खनै पर्दैन कसैले

जताततै काल पल्काइदिएकाछौं

जनतालाई अकालमा मर्नबाट जोगाउन सकेनौं त के भो ?

मरिसकेपछि हरेकको नाममा गोहीको आँसु चुहाइदिएकैछौं

बचन पूरा गर्न सकेनौं त के भो ?

प्रतिबद्धता पटक पटक दोहो¥याइरहेकैछौं

डाडुपन्यौं आफ्नो हातमा परेको यो बेला

अलिकति मनपरी गर्यौं त के बिगार्यौं ?

सबैले जे गर्दै आ’थे त्यही न दोहोराइदिएका हौं

बधाई दिन्छौं हामी आफैलाई

राजनीतिको लाज बचाइदिएकाछौं

नीति विनाको राज गर्ने सूत्र नयाँ पहिल्याएकाछौ

जनतालाई नयाँ नेपालको

अनुहार राम्रो देखाइदिएकाछौं

परिवर्तन भनेको यही त हो

रुपान्तरण भनेको यही त हो

शान्तिसुरक्षा पूरा खलबल्याइदिएकैछौं

मन लागे जसले जहाँ जे गरे पनि हुने

बाटो सबै खोलिदिएकैछौं

जनताको अधिकार हनन भइरहेको छ त के भो ?

अधिकारका लागि लड्न सबैलाई सिकाइदिएकैछौं

समय त्यो पछाडि कहिल्यै फर्कदैन

बढिरहन्छ निरन्तर अघिअघि

प्रकृतिशास्त्रको यो निर्धारणलाई

भत्काउन सफल भएकाछौं

घुँडा टेक्न समयलाई बाध्य हामीले पारेकाछौं

बत्ति निभाइ दिएकाछौं

धारा सुकाइदिएकाछौं

ढुङ्गगेयुगको झझल्को दिने

दिनहरू जनतालाई देखाइदिएकाछौं

हामी सर्जक हौं नयाँ युगको

गुरु हौं नयाँ अभ्यासको

अन्धकार वर्तमानको

अन्धकार भविष्यको

अन्धकार

अन्धकार

बस् अन्धकार युगको

बधाई दिन्छौं हामी आफैलाई

आविष्कारक हौं हामी अन्धकार युगको ।

विशालनगर, काठमाडौं

लेखकका अन्य रचना पढ्न यहाँ क्लिक गर्नुहोस ।