गजल

गजल विक्रम तिमिल्सिना February 7, 2010, 2:06 pm

---

नचाहिने नाताहरू गाँसिन्छन् के गर्नु ?

बनाउँथेँ ताजमहल भासिन्छन् के गर्नु ?

मनभित्र सजिएका मनमै मर्दा रै’छन्

आफ्नै मनले नखाएका टाँसिन्छन् के गर्नु ?

सोचेभन्दा रङ्गीचङ्गी संसार भेटेँ कति

आँखा खुलेपछि सबै मासिन्छन् के गर्नु ?

ढुङ्गा हुँ म, फूल तिमी नआऊ भन्दाभन्दै

बेहोसी भई ठोक्किएर नासिन्छन् के गर्नु ?

प्रेम नै हो पूजा भनी पग्लिनेकै शीतल

माया बगाउने मुटु तासिन्छन् के गर्नु ?

लेखकका अन्य रचना पढ्न यहाँ क्लिक गर्नुहोस ।