प्रश्नको अर्थ

कविता मनोज बोगटी February 26, 2010, 1:57 pm

---

सुनको थैला र कविता

एकै हुन्‌ बा?

••

बूढ़ो किसानको हत्केलाको ठेला

उसको छोरोको पेट हो

अनि उसको निधार चाहीँ तिम्रो किताब।

तिम्रा

कलिला क,ख-हरू

गाउँहरू हुन्‌

शब्द जिल्ला,वाक्य राज्य

अनि कविता चाहीँ तिम्रो देश।

•

धानका गेंड़ाहरू

तिम्रो आमाका आँखाहरू

जहॉं अग्लिएका छन्‌

सपनाका हिमालहरू

अनि तिम्रो विपना चाहीँ त्यसको आरोही।

•

यही गाउँको हावा

देशको सास।

तिमी त्यो सासको गहिरोमा जबदेखि डुब्नसक्ने हुनेछौ

त्यसबेला

तिम्रो प्रश्नबाट भुर्र उड़्‌नेछ

दुइ पखेटा अर्थ।

••

सुनको थैला र कविता

एकै हुन्‌ बाबु?

लेखकका अन्य रचना पढ्न यहाँ क्लिक गर्नुहोस ।