19 वर्षदेखि निरन्तर
समकालीन साहित्य
समकालीन साहित्य
तपाईं डेरा खोज्दै हुनुहुन्छ?
सुविधायुक्त घर रोज्दै हुनुहुन्छ?
भन्नुहोस् तपाईंलाई कस्तो चाहिन्छ?
आउनुहोस् मकहाँ डेरा पाइन्छ।
सुविधाका लागि डराउनु पर्दैन
कुनै कुरामा कराउनु पर्दैन
आफू भलो त जगतै भलो
कहिले आफैँ आगो हुनुहोस्
कहिले आफैँ पानी हुनुहोस्
यस्तो डेरा कहाँ पाइन्छ
भन्नुहोस् तपाईंलाई कस्तो चाहिन्छ
आउनुहोस् मकहाँ डेरा पाइन्छ।
लाइन छ ― बत्ती छैन
धारो छ ― पानी छैन
सुत्न नमिले पनि बस्न पाइन्छ
भन्नुहोस् तपाईंलाई कस्तो चाहिन्छ?
आउनुहोस् मकहाँ डेरा पाइन्छ।
गफ गर्नुहोस् ― बोल्न पाइन्न
झ्याल कहिल्यै खोल्न पाइन्न
कौसीमाथि डुल्न पाइन्न
पाहुना आए हुल्न पाइन्न
सधैँ बाहिर रहे पनि पानी–बत्तीको महसुल चाहिन्छ
भन्नुहोस् तपाईंलाई कस्तो चाहिन्छ?
आउनुहोस् मकहाँ डेरा पाइन्छ।
डेरा होइन ― दरबार हो
तपाईंका लागि घरबार हो
रङ्गशाला हो ― दौडनुहोस्
स्विमिङपुल हो ― पौडनुहोस्
टुँडिखेल आफैँ बनाउनुहोस् ― भित्रै जात्रा मनाउनुहोस्
यहाँ केवल बोल्न पाइन्न, अरू सबै छुट छ
भन्नुहोस् तपाईंलाई कस्तो चाहिन्छ?
आउनुहोस् मकहाँ डेरा पाइन्छ।
डेरा हो यो सस्तो छ ― खेल्ने मैदान जस्तो छ
हावा छिर्छ ― घाम छिर्दैन
नपरेसम्म पानी छिर्दैन
मुसाका दुला टाल्नुपर्छ ― दिउसै बत्ती बाल्नुपर्छ
अग्रिम भाडा तिर्नुहोस् ― निहुरेर भित्र छिर्नुहोस्
यस्तो डेरा कहाँ पाइन्छ?
भन्नुहोस् तपाईंलाई यस्तै चाहिन्छ?
आउनुहोस् मकहाँ डेरा पाइन्छ।
शान्तिनगर ― ५, झापा, हाल: काठमाडौँ।