सत्य आफै बोल्छ

कविता शेखर ढुंगेल May 24, 2010, 4:42 am

---

मानिस नियमित बोलिराख्छ

कतै कुन्ठा , कतै स्वार्थ बोकेर

समयले सिमा तोक्छ

झुठका पुलिन्दा निख्रिन थाल्छ

धकेलिदै जब भित्तामा पुग्छ

एक दिन ढिला चाडो सत्य आफै बोल्छ ।

हो त मानिस बोलिराख्छ

कतै कुटिल मुस्कान बाँडेर

कतै घनिभूत आक्रोस पोखेर

कहिले भ्रम, कहिले सत्ता बनेर

जब खेल को पर्दा खस्न थाल्छ

जानी न जानी सत्य आफै बोल्छ ।

उ हेर मानिस बोलिरहेको छ

कहिले सपनामा कहिले जोशमा

कहिले निरस कहिले कर्कस

जब नियतिका पर्खाल भात्किन्छ

सामुन्ने निस्पटता छाउँछ

दु:ख होस् या सुख सत्य आफै बोल्छ ।

हो त मानिस बोल्छ बोल्न चाहन्छ

बाँधिएको छ रे ऊ सिदान्तको रेखामा

बाँधिएको छ रे ऊ अनुशासनको सिमामा

जब तन मन र धनले बिदा हुन ढिपी गर्छ

राम्रो न राम्रो बिर्सेंर सबै

अन्तत आँफै मानिस सत्य बोल्छ ।

अमेरिका

लेखकका अन्य रचना पढ्न यहाँ क्लिक गर्नुहोस ।