गीत

गीत शान्ता गौतम July 9, 2010, 10:17 am

---

यो वर्षमासको उर्लिदो भेल

कहाँबाट आयौ हे मेरा भाइ

बाआमा कस्ता छन् ?

यो वर्षमासको उर्लिदो भेल

भेटघाट गर्न आएको दिदी

बाआमा निकै छन्...।

सधैं त भाइ नि शिरैमा टोपी

आज त खै छैन मेरा भाइ

बाआमा कस्ता छन् ?

सधैं त भाइ नि दोबरी दौरा

आज त एकसरो मेरा भाइ

बाबा र खसेको तीन महिना भयो

आमा त दुई महिना मेरी दिदी

गैगए परलोक...

नरोउ दिदी नि ती आँसु पुछ

तिम्रो त माइती म छँदैछु नि

मेरो पो को छ र...?

आमाले लाएको शिरैको फूल

त्यो पनि तिमीलाई मेरी दिदी

त्यो पनि तिमीलाई ।

शिरैकी फूल नि मै सके पाउँला

बाआमा काँ पाउँला मेरा भाइ

बाआमा काँ पाउँला...।

आज त भाइ नि म छु त भन्छ्यौ

भोलि नै ल्याउँछौ पराइकी छोरी

भैजान्छै बिरानो ।

पराइकी छोरी नि बिरानो भए

मै हुन्न बिरानो मेरी दिदी

मै हुन्न बिरानो...।

(पूर्वि पहाडी क्षेत्रमा प्रचलित संगिनी गीत)

फिदिम १, पाँचथर

लेखकका अन्य रचना पढ्न यहाँ क्लिक गर्नुहोस ।