न त आज कुनै खुसी न भोलिको आश छ
भिजेको परेली भन्छ मेरो संसार उदास छ ।
न त मेरो शून्यपन कसैसँग बोल्न सक्छ
वैलाएको कोपिलाले कहाँ घुम्टो खोल्न सक्छ ?
अडिए झैं लाग्छ वायु थाकेजस्तो नीर गगन
डरलाग्दो सन्नाटामा चन्द्रमा गम्भीर छ झन् ।।
चुपचाप मेरो जून आकाश चुपचाप छ
भिजेको परेली भन्छ मेरो संसार उदास छ ।
अधुरा ती गीतहरु गुन्गुनाउन बाँकी नै छ
जलाउने जल्ने कथा सुनाउन बाँकी नै छ ।
भेटिएको जीवन साथी अनायासै छुट्यो आज
देखिएको मीठो सपना मध्यरातमा टुट्यो आज ।।
कहाँ गयो भोकनिन्द्रा न त कुनै प्यास छ
भिजेको परेली भन्छ मेरो संसार उदास छ ।
सधँै भेट हुने मृत्यु आउन्न कि आज साँझ
अन्धकार कालो रात अझै कालो लाग्छ आज ।
न त कुनै पथिक छ निर्जन ती पाखातिर
देखिँदैन कुनै नसा प्रियसीका आँखातिर ।।
न फूलमा सुगन्ध छ न त मधुमास छ
भिजेको परेली भन्छ मेरो संसार उदास छ ।