शब्दसीमा

कविता श्याम रिमाल August 5, 2010, 6:30 pm

---

मानिसहरु किन व्यर्थमा

शब्द फालिरहेछन् हँ ?

हावामा बिलाइरहेका शब्दप्रति कुनै शोक छैन

शब्दवाचकहरुलाई,

न शब्दलेखकहरु

कागजका भावहीन शब्दप्रति पश्चाताप गर्छन्

शब्दको अनस्तित्वमा

आशौच बार्छन् त

शान्त सौम्य हावाहरु

सेता कागजहरु

र मौन आत्माहरु

शब्द त ब्रम्ह हो

शब्द त सृष्टि हो

शब्द त सत्य हो र शाश्वत रहन्छ

शब्द त नित्य हो र अनन्त रहन्छ

मानिसहरु शक्तिहीन शब्द फ्याँकेर

किन आफंैलाई कमजोर बनाइरहेछन् ?

लेखकका अन्य रचना पढ्न यहाँ क्लिक गर्नुहोस ।