मूर्ति

कविता छविरमण सिलवाल April 28, 2011, 6:05 pm

---

मौन रहन्छ मूर्ति

कथित भक्तहरूको

आस्थाको मन्दिर

आस्थाको मूर्ति

आस्थाको देवता



सुन्छन् या सुन्दैनन्

भक्तका पुकार

बग्रेल्ती छरिन्छन्

भक्तहरूका आस्था

भक्तहरूको पुकार

शालीन ढुङ्गे मूर्तिहरूमा

ठोकिन्छन् पुकारहरू

र,

बज्न थाल्छन्

घण्टहरू....ट्वाङ....ट्वाङ.....!

बज्न थाल्दछन् शङ्ख

भक्त त स्वार्थी हो

ढुङ्गेमूर्ति वा देवता

स्वार्थी छैनन् पक्कैं

भक्तले चढाएका

प्रसाद र फूलहरूले

प्रसन्न भए पनि,

वाहाना मान्छैकै हो



कसरी बोल्ने मूर्तिहरू

स्वाभिमान गुमाएकाहरूसँग

शालीन मूर्तिहरू

बेच्नेहरूसँग

ऊ प्रतिकार गर्न सक्तैन

एउटा मन्दिरमा ठडिन्छ,

टुलुटुलु हेर्छ

मान्छेहरूको तमासा

कथित भक्त भनाउँदाहरू

धुपबत्ती र अबिरले सिँगार्छन्

के थाहा मान्छेहरूलाई

मुर्ति भएर बस्न कति कठिन हुन्छ

सबैका दुःख दर्दहरू सुन्न

बग्रेल्ती छरिएका समस्याहरू

उठाउन सक्तैन मूर्ति

टुलुटुलु हेर्छ

हामी सधै पूजा गर्छौँ

र माग्छाँै,

हाम्रो कल्याणको कामना !

कल्याणको चाहना !

आस्थाको देवतासँग

आस्थाको मूर्तिसँग !

लेखकका अन्य रचना पढ्न यहाँ क्लिक गर्नुहोस ।