14 वर्ष देखी निरन्तर
समकालीन साहित्य

प्रतिबद्घ यात्रा

कविता निशान निष्कर्ष May 13, 2011, 4:34 am

विचारमा लागेको कालो धब्बालाई

आलोकमय बनाउन खोज्ने हामी

नियतमा तुष बाँकी राख्यौँ भने

कहाँ पुगिन्छ र गन्तव्यमा ?

हामीले त छुनु छ — विश्वास,

भेट्नु छ — लक्ष्य, टेक्नु छ —शिखर ।

त्यसैले,

यो यात्रामा इमान गुमाउनु हन्न ।

यो सभ्यताको यात्रा हो,

यो सत्यताको सुरुवात हो,

यात्रामा काँडाकै अवरोधहरू होलान्,

र लामो विकृतिका पर्खालहरू उभिएलान् ।

पन्छाउनु छ — काँडाहरू

भत्काउनु छ —पर्खालहरू

अनि,

सम्पन्न गराउनु छ — यात्रा ।

हिमालको कञ्चन हिउँ

पहाडको राताम्मे गुँरास

तराइको फराकिलो छात्ती

यी सबै भिर्न सक्षम हुनु छ यो यात्रामा ।

बनाउनु छ बाटो — हिउँको भाषमा

खन्नुछ खुड्किलो — पत्थरे पहाडमा

उर्मानु छ विश्वास — तराइको फाँटमा ।

यो स्वाभिमानको प्रतिबद्घ यात्रामा

आत्मसमर्पणको अबशेषसम्म बोक्नुहुन्न ।

अन्तिम विजयको निर्भिक यात्रा हो यो

हीनताबोधका विकृतग्रन्थीहरू हुर्काउनु हुन्न ।

त्यसैले,

संसार बदल्ने यो यात्रामा हामीले

सजीव संकल्प तुहाउनु हुन्न ।

पन्द्रुङ्ग १, गोरखा

लेखकका अन्य रचना पढ्न यहाँ क्लिक गर्नुहोस ।