अर्थात्

कविता नारायण तिवारी May 31, 2011, 1:23 pm

---

म कविता हुँ

खाने कोशिश गर्छु कसैलाई

अर्थात्–

अँध्याराहरूलाई ।

म कविता हुँ

उठ्न चाहन्छु धेरै–धेरै माथि

अर्थात्–

सीमाहरू भन्दा धेरै माथि ।

म कविता हुँ

स्वप्नको सयलभन्दा

मीठो लाग्छ मलाई

अर्थात्–

त्यो पसीना ।

म कविता हुँ

काप कापबाट छिरेर छुन चाहन्छु कसैलाई

अर्थात्–

दिलहरूलाई ।

म कविता हुँ

कालो धेरै कालो तर मोती

अर्थात्–

नेल्सन मण्डेला ।

म कविता हुँ

र मेरो आराधना

त्यो फाटेको वस्त्रको उदास चित्र

अर्थात्–

सृष्टिले ठगेको त्यो मान्छे !

सायद मेरै प्रतिआकृति....

सायद मेरै नेपालकै प्रतिबिम्ब ... !!

लेखकका अन्य रचना पढ्न यहाँ क्लिक गर्नुहोस ।