राम्रो 'म'

कविता अवतार ढकाल June 5, 2011, 7:23 am

---

आउनुहोस महासय

मसँग आउनुहोस,

एउटा आदिम समयको

अविश्वासिलो कथा

सुन्नुहोस र अरुलाई सुनाउनुहोस ।

ऐनाको आविस्कार नभएको बेलाको कुरा

आफ्नै छायाँ चिन्न नथालेको बेलाको कुरा

‘म’ राम्रो थियो –

‘म’ मात्र राम्रो थियो त्यो बेला

र ‘तँ’हरु

‘तँ’हरु सबै नराम्रा थिए

किनकी –

‘म’ नदेखिने

‘तँ’हरु मात्र देखिने बेला थियो त्यो ।

हो त्यही बेलाको कथा –

‘म’ को अल्पमत र तँ को बहुमत

तर प्रत्येक पटक

प्रत्येक ‘तँ’ ‘म’ मा रुपान्तर हुन्थ्यो

र प्रत्येक ‘म’ एउटा मात्र हुन्थ्यो

‘तँ’हरु कहिल्यै मिल्दैनथे

र उनीहरु –

‘म’ हरु भएर लडिरहन्थे ।

पानीको आफ्नै छायाँलाई

‘तँ’ ठानेर लड्थे ‘म’हरु

आफुलाई नछाड्ने आफ्नै छायाँलाई

‘तँ’ ठानेर आक्रमण गर्थे महरु

‘म’ र ‘तँ’ कहिल्यै मिल्दैनथे

कहिल्यै कसैले जित्दैनथ्यो त्यो युद्ध

प्रत्येक ‘म’

आफुलाई अपराजित ठान्थ्यो

र लडिरहन्थ्यो

किनकि

‘म’ मात्र राम्रो थियो त्यो बेला

र ‘तँ’हरु सबै नराम्रा थिए ।

लेखकका अन्य रचना पढ्न यहाँ क्लिक गर्नुहोस ।