बैँस

कविता रुपेश राई June 9, 2011, 9:54 am

---

हिउँदले कक्रिएका

झार जङ्गल र

गाउँका गमलामा

उम्रँदै गरेका लालुपाते,

शिशिरपछिका बसन्तमा

पाक्न थालेका

सिजन फ्लावरहरू

कति शोभनीय छ

तिमी चड़्दै गरेको बैँसमा।

पैयुँ चड़ेको बैँस

जावाकुसुम चड़ेको बैँस

गाउँभरि नै आरुबगड़ामा

चड़ेको बैँस, पारी

कफेरको डाँड़ाबाट

फाटेको रविको बैँसले

स्पर्श गर्दैगरेको मेरो

गाउँ कति लोभनीय छ

तिमी चड़्दै गरेको बैँसमा।

तिमी

चड़्दै गरेको बैँसमा

कति

आकुल छन् नसाहरू

कति

व्याकुल छन् दसाहरू

स्निग्ध

प्रेम रोमाञ्च हुनलाई

म

झर्दै गरेको बैँसमा।

लेखकका अन्य रचना पढ्न यहाँ क्लिक गर्नुहोस ।