14 वर्ष देखी निरन्तर
समकालीन साहित्य

एउटा स्केच

कविता अबीर खालिङ November 17, 2011, 2:54 am

वर्तमान को त्रासद जङलबाट

अक्षरको वीर्य खोजेर ल्याएको छु

रोप्छु अब तिम्रा आँखाका

कचौरामा ।

अभिशप्त मान्छेका मन मस्तिष्कबाट

उठेको छ मुँस्लो धुँवाँको

र विचारको बगदाद ढकिएको छ ।

फाटेको तन्नामा परिवर्त्तित् छ सोंच

तुहिनुमा उद्द्यतशील सधैं।

भोकग्रस्त आकाशबाट घाम तुहेको छ

संकटको छातामा ओत थापेर

हिडिरहेछन महाजुलुस।

शताब्दी-स्वरको चट्याङ खसेको छ

रुख्-रुखमा ।

उर्लेको छ वेमौसामको वादी

खुशीको गीत गाउँने चराको वस्तीमा।

यसबेला

हातमा क्यामेरा लिएर

खिँच्न खोज्दैछु एउटा तस्वीर

तिम्रो,मेरो, हामी दुवैको

यसो भनौं

हामी सबैको हाँसिरहेको अनुहारको।

लेखकका अन्य रचना पढ्न यहाँ क्लिक गर्नुहोस ।