19 वर्षदेखि निरन्तर
समकालीन साहित्य
समकालीन साहित्य
गोडा चारेक पल्ट
गोडा मोलेपछी सम्पादकको
छापियो एउटा कबिता कविज्यूको
जसको शिर्षक् थियो
'स्वाभिमान' !!!
खुबै रसिक छन् उनी
अस्तिमात्र
भेटेको थिए,
भट्टिपसलमा
भन्दै थिए,
देश बिग्रियो असलमा !
म सुन्ने क्षमता राख्थे
केही थान 'स्वाभिमान'हरु
र उनी थिए निकै पछि भेटिएका !
खुबै रसिक !जोसिएका !
आलु र पृथ्वी
दाँजेर लेखेको छु ।
कुरो बुझ्नुभएन के?
उनी भन्दै थिए
आलु चपाउँदै ।
खुबै रसिक छन् उनी
देशको स्थिती हेर्दै लेखे
जहाँ जे ट्याक्क मिल्छ
त्यही लेखे , बुझ्नुभएन के?
घुटुक्क पार्दै भने
मैले घुटुक्क पार्दै सुने ।
काइदाका छन् उनी !
तेस्रो बोतलको
दोस्रो पेगतिरको
कुरा हो
स्वर अचानक सानो पार्दै भने
लगभग खासखुस गर्दै
कुरा सब मिलाई सक्याछु
प्रकाशक
बितरक
सबै ट्याक्क !
अलिकति पैसा
जोहो गर्नु छ
पुरस्कारको लागि !
अनी हाँसेका थिए
हे.. हे.. हे.. हे !
र
अराजक हुन्छ
काव्य चेत
भन्दै अचेत भएका थिए उनी !
खुबै रसिक छन् उनी !
अहिले
उनैको कविता पढ्दै छु
'स्वाभिमान' !!!