14 वर्ष देखी निरन्तर
समकालीन साहित्य

ए प्रिय मन !

कविता तुलसी प्रवास October 13, 2012, 2:34 am

म अक्षरहरूको बुई चढेर

दूर अक्षरयात्रामा जान चाहन्छु

ए प्रिय मन !

मलाई नरोक

दूर देशका दूर कवितामा

म आफूलाई हराउन चाहन्छु ।

मलाई के दियो र खै

यो शहरले ?

म बस्ती बस्तीमा पुगेर

मन सँग मन साट्न चाहन्छु

म अक्षरहरूको बुई चढेर

दूर अक्षरयात्रामा जान चाहन्छु ।

जहाँ भोक छ, जहाँ रोग छ

यो देशभित्र रोपिएको

अव्यवस्थाको शोक छ

तिनै निर्धन बस्तीहरूमा

म अक्षरहरूको बुई चढेर

अक्षरहरूकै मलम लगाउन चाहन्छु ।

मलाई नरोक ए प्रिय मन !

म दूर देशमा एउटा

बुद्घ जन्माउन चाहन्छु

यी खोला, कन्दरा, हिमाल

अनि सुसेलीहरूमा

सेतीको पानी जस्तै

सेता सेता मनहरूको माझमा

म अक्षर रोप्न चाहन्छु ।

मलाई नरोक,

म अक्षरहरूको बुई चढेर

अक्षरयात्रामा जान चाहन्छु

चहराइरहेका मनहरूमा

अक्षरकै मलम लगाउन चाहन्छु

म दूर देशमा एउटा

बुद्घ जन्माउन चाहन्छु ।।

पोखरा

लेखकका अन्य रचना पढ्न यहाँ क्लिक गर्नुहोस ।