19 वर्षदेखि निरन्तर
समकालीन साहित्य
समकालीन साहित्य
एउटा कालखण्डपछि ,
आजै त हो,
मैले तिमीला , बेस्सरी सम्झिएको ,
समयको पत्र पत्र मुनि किचिएर ,
विस्मृतप्राय तिमी !
धन्य छ ट्युलिप ,
तिम्रै रंगीन दुनियाँले ,
आज मलाई ,
मेरो बिरानोझैँ बुकी फूल सम्झाई दियौ !
आजै त हो,
टप्प टिप्न मन रुने ,
सुन्दर ट्युलिपहरुमाझ पनि ,
मेरो आँखाको नानीमै बिझाएनौ तिमी !
क्षमा प्रार्थी छु ,
निर्दयतापुर्वक चुँडालेर, किचिमिची कति भए ,
अपराध बोधको गहिरो घाउ दुख्न थालेकोछ ,
तर पनि आनन्दित छु, आन्दोलित छु ,
कमसेकम मैले नाक खुमच्याउँदै छोएकै यादमा !
तर आज ,
म कति तढपिएँ ? बेसुरमै ,
तिम्रो नयनस्पर्शको अभावमा ,
सायद तिमी विस्मित हुन्छौ ,
म बोध गरिरहेछु ,
हो अपूर्व सुन्दर अनि ,
औधि मायालु थियौ तिमी !
समयछालले हुत्त्याएर ,
अर्को गोलार्धमा पछारिएको म ,
भौतारिंदै !
अनि अर्को गोलार्धमा ,
अजर तिमी ,
मेरो नजिकै लागिरहेछ ,
मेरो मितझैं लागिरहेछ !
मृगतृष्णामा म ,
यी ट्युलिपकाफुलहरुसित ,
र लिएको रंगीन सापटीमै ,
पलपल पछुताउँदै !
तिम्रो व्यग्र प्रतिक्षामाछु ,
मेरो औधि प्यारो ,
सुन्दर बुकी फूल !
एन्त्वर्प,बेल्जियम