जन्मिन्छु र आँखा खोल्छु
अनि म जात हुन्छु
पाउंछु केहि रङहरुमा
पाउंछु केहि आकारहरुमा
पाउंछु केहि संस्कारहरुमा
रमाउनलाई पुग्ने भतेर र जात्राहरुमा |
तर अटाउंदैन जिन्दगीको यात्रा जात्राहरुमा
हिंड्दै जांदा केहि फाल्छु
केहि राख्छु, केहि बटुल्छु
म हुर्किन्छु अनि सन्जात हुन्छु |
जात, सन्जात र बिजात हुँदै मेरो जात
कायापलट गरिरहन्छ विश्व रङमन्चमा
संजोग, बाध्यता र अवसरसँगका मल्ल युद्धहरुमा |
म भित्र जात रहला नरहला, बिस्तारै जातभित्र म रहन्न
दोस्रो पल्ट आँखा खोल्छु
र कर्मको खेतमा आफ्नो जात आफै रोप्छु
तर नितान्त एक्लो, अब भतेर र जात्राहरु छैनन्
रङहरु छैनन्, आकारहरु छैनन् |
म नापिन्न अब
मेरा आँखाका गोलाई र नाकका उचाईहरुले
बाबुको बिंडो र आमाका जिब्रोहरुले
मेरो छालाका श्याम श्वेत रंगहरुले
बिन्ती छ मलाई फैलन देऊ |
पहिलोपल्ट मलाई नाप,
मान्छे हुनुको तराजुमा
मैले एक्लै हिंडेका गोरेटाहरुमा
आफैले कोरेका मेरा धर्साहरुमा
त्यसपछि म मर्छु र निर्जात हुन्छु
कसैको याद र केहि संवाद हुन्छु
हाल: क्यानाडा