14 वर्ष देखी निरन्तर
समकालीन साहित्य

दशैंको खोजीमा कोलम्बस

कविता गोपाल झापाली October 11, 2013, 3:48 pm
गोपाल झापाली
गोपाल झापाली

एउटा कोलम्बसले फेरी अर्को दशैंको खोजीमा,

एक मुट्ठी उल्लास र एक पाथी औपचारीकताले भरिएको

त्यहि दशैंमा निधार बाध्यताको अक्षताले लिपिएला,

कानमा लोकाचारको जमरा सिउरिएला ।

तर

मेरो दशै र उसको दशैं उस्तै छैन ।

मेरो दशैंमा लिङ्गे पीङ् हुन्छ कुण्ठा उडाउने,

चचहुईमा पीडा ओकल्ने ।

पहेंलपुर जमराले समृद्धी बोक्छन,

लालिम्य अक्षतामा आस्था र आलोक बोक्छन् ।

उहिले

जंगबहादुरले पनि एउटा दशैं पत्तो लगाए,

जाग्यो, चक्यो र निध्यो त्यो दशैंको दियो

भो कोलम्बस जंगबहादुर नबन,

खोज्छौ भने कहिल्यै नभेटिएको पर्व खोज

मेरै, हाम्रै दशैंमा रमाउन सिक......

जंगबहादुरको जस्तै निभ्ने दियो नबाल

के थाहा,

तिम्रो दियोको झिल्को तिम्रो र मेरो

संसार जलाउन काफि हुन सक्दैन र ?

लेखकका अन्य रचना पढ्न यहाँ क्लिक गर्नुहोस ।