त्यसैले नेता होइनन् यी लेता हुन् !

कविता पेशल आचार्य December 1, 2013, 5:29 am

---

भरिला होइनन् यी फोस्रा हुन्

रसिला होइनन् यी खोस्टा हुन् ।

आफ्ना होइनन् यी अरूका हुन्

जुसका सिसी होइनन् यी दारूका हुन् ।।

त्यसैले नेता होइनन् यी लेता हुन् !

१

मालिक हँुदै होइनन् नोकर हुन्

भ्रम नहोस् हजुर, यी जोकर हुन् ।

स्वपूजित गानमा औधी रमाउछन्

जनता–जनता खूब लडाउँछन् ।।

त्यसैले नेता होइनन् यी लेता हुन् !

२

नायक होइनन् यी खलनायक हुन्

एकताका पूजारी नभई पीडादायक हुन् ।

सन्देश बाँड्ने होइनन् यी सद्भाव भाँड्ने हुन्

शान्त र कोमल देश सक्दो फाँड्ने हुन् ।।

त्यसैले नेता होइनन् यी लेता हुन् !

३

गौरव होइनन् यी रौरव हुन्

तमासे हुन् बरू बारमासे हुन् ।

वसन्त होइनन् यी मौसमी हुन्

कलरव होइनन् यी कर्कश हुन् ।।

त्यसैले नेता होइनन् यी लेता हुन् !

४

पेटेन्ट होइनन् यी एजेन्ट हुन्

बरू विदेशीका कम्पोनेन्ट हुन् ।

माटो चिन्दैनन् तर फाटो दिन्छन्

देश धकेल्ने एकौटा बाटो दिन्छन् ।।

त्यसैले नेता होइनन् यी लेता हुन् !

५

गहना होइनन् यी गएका हुन्

संरचना होइनन् यी सडेका हुन् ।

आरम्भ होइनन् यी अन्त्य हुन्

तालव्य नभएर सबै दन्त्य हुन् ।।

त्यसैले नेता होइनन् यी लेता हुन् !

(ब्यंग्य कविता)

शिक्षक, मन्थली उमावि, मन्थली

लेखकका अन्य रचना पढ्न यहाँ क्लिक गर्नुहोस ।