18 वर्षदेखि निरन्तर
समकालीन साहित्य
समकालीन साहित्य
उता घरदेशमा
भीड हराएर उजाडिएको गाउँ सहरमा
विदेश उड्ने सपना बोकेका
युवाहरु छन् ।
यता परदेशमा
भीडमा हराएर पनि
पहिचानको सगरमाथा उठाउने
सपना बोकेका नेपाली जाति छन् ।
यो लण्डन सहरमा
घरदेश र आफन्त सम्झेर
बगाएका छैनन् कसैले
आँशुको ‘थेम्स’ नदी
बरु उठाएका छन्
फानबारो, आस्फोर्ड, ग्रीनफोर्डमा
आफ्नो पहिचानको ‘बिग बेन’हरु ।
नेपाली समुदायले घरघरमा
बनाउँदैछन् ‘बेष्टमिनिष्टर’
जहाँबाट हुर्कने छ प्रजातन्त्र ।
देखिने छ एक दिन लण्डनमा
सबै भन्दा अग्लो
नेपाली जातिको सांस्कृतिक धरहरा,
केही समयपछि खुल्नेछन्
नेपाली डायास्पोराको
खुल्ला विश्वविद्यालय
र पढाई हुनेछ त्यहाँ
दुईसय वर्ष पुरानो
गोर्खाली सेनाको वीरगाथा
र बेलायती नेपाली जातिको ईतिहास ।
लन्डन, बेलायत