19 वर्षदेखि निरन्तर
समकालीन साहित्य
समकालीन साहित्य
मुलुक छ्याङ्ग नदेखियोस् भनेर
बादलको घुम्टो लगाइ दिएं
निलो आकाश भरि
सेतै कमेरो पोती दिएं ।
सेतो मलाई मन पर्ने भएकोले
जताततै सेतो हेर्न चाहि दिएं
हुंदैन बग्न रगत रातो भनेर
सेतै कपडाले बेर्न लगाईदिए ।
गोडमेल गरिएका
ती पहाडहरुलाई चिथोरेर
अनि डोजर लगाएर
फुस्रो धुलाम्मे बनाइदिएं
लाली गुरांस फूल्ला कि रातो भनेर
सेता गलफूले फूलहरु लगाई दिएं
उसै बाढीग्रस्त तराइलाई
सेताम्य बालुवामय देख्न चाहें ।
टीका सिंधुर हुंदैन निधारमा भनेर
पुछ्न लगाइ दिएं
मिल्दैन पोते गलामा भनेर
फाल्न लगाइदिएं
हुंदैन रातो तनमा भनेर
सेतै बस्त्र लगाइ दिए ।
फुल्न हुंदैन तोरीहरु पहेंला,
झुल्न हुंदैन धानहरु सुनौला भनेर
बांझो मै सेता झारहरु फूलाइ दिएं
हेर्न हुंदैन फुस्रा आंखाहरु भनेर
सेताम्य मोतीहरु झार्न लगाइ दिए ।
बनोस् सेतै खरानी भनेर
ुंविधानै जलाई दिएं
सेतै धर्तीका सपना बांडेर
सवैलाई फूटाइदिएं
सेतै हात्तीको बल भन्दै
शक्ति प्रदर्शन गरिदिएं
स्वभाविक नियतिको रुपमा
सैतै तुषारापातमा रुमल्लिएं ।
भर्जिनिया, युएसए ।