19 वर्षदेखि निरन्तर
समकालीन साहित्य
समकालीन साहित्य
आँधी–बेहरीहरु अझै बाँकी नै छन्
अविश्वासको अचानोमा सपनाहरु थाँती नै छन्
दोबाटोमा पुगेर उभिएको छ जिन्दगी
कुनै निकास छ कि लाल ‘अन्जान’ जी ?
बैंसमा जिन्दगी इन्द्रकमल लाग्दो रहेछ
मनका पाखाभरि कुर्कुरे रहर जाग्दो रहेछ
असीनाले निर्घात कुटेपछि
ऐनाजस्तै रहरहरु फुटेपछि
सिस्नोको ओछ्यान हुँदो रहेछ जिन्दगी
कुनै औषधि छ कि लाल ‘अन्जान’ जी ?
यतिखेर मनका रहरहरु निर्वासित भएका छन्
मनको कुर्सीमा जहरहरु निर्वाचित भएका छन्
खुशीहरु मुग्लानतिरै भासिएपछि
भष्मेजस्तै इच्छाहरु मासिएपछि
कोक्रोमा हल्लिएजस्तो कहाँ हुँदो रहेछ र जिन्दगी
कुनै जवाफ छ कि लाल ‘अन्जान’ जी ?
लामो समयदेखि
रातविरुद्ध युद्धको घोषणा गरिएको छ
भर्खरै÷भर्खरै
नाम्सालिङको कापबाट बिहानीको पूर्वाभास छरिएको छ
बिद्रोहको ऐलान गरेपछि
संकटकालजस्तो रात टरेपछि
पहारिलो घामको पर्याय हुँदो रहेछ जिन्दगी
कुनै आशंका छ कि लाल ‘अन्जान’ जी ?