दिग्भ्रमित प्वालहरू

कविता नवीन मगर गाउँले July 23, 2014, 7:36 pm

---

दिग्भ्रमित प्वालहरू

आफैँलाई खेलौना सम्झेर

सोचिरहेका सपनाहरू

उदेक लाग्दो नजिर

आफैँलाई नङ्ग्याउँछ,

उपहासका मार्गचित्रहरूबाट

अनि प्रष्फुटित हुन्छन्,

रितिएका रितहरूबाट

जीवन र मृत्युको दूरी

कठिन छन् शब्दातीतहरू

खोक्रो आवरण भिरेर

चिर्न सकिँदैन त्यो उज्यालो

संसारलाई हेर

आफँैलाई खोज

काफी हुन्छन् शाब्दिक पीठहरू,

उन्मादको स्वतन्त्रता

र टाढिएको सार्वभौमिकता

विष्फोटित छन् एक र अर्को

लखेटिरहेका शब्दातीतहरूको

खातिर

हो र हैन

राम्रो र नराम्रो

पक्ष र विपक्ष

समानान्तर रेखाका

तानिएका विपरीत ध्रुव्रहरू

विषमा अमृत छ

अमृतमा विष छ

सत्यमा असत्य छ

असत्यमा सत्य छ

लुकिरहेका एक रूपहरू

बग्दछ शब्द पीठहरूमै

बहुरूपि लहरा भएर

तथ्यको आँगनमा,

कुन संसारलाई हेरेका छन् ?

आकाश चिथोर्न

दिग्भ्रमित प्वालहरू ।

लेखकका अन्य रचना पढ्न यहाँ क्लिक गर्नुहोस ।