चरी म बिचरी

कविता ऋषि के.बी. March 9, 2015, 3:31 pm

---

स्वप्निल पङ्खको भर उडिरहेकी थिए

कसैले इन्द्रेणी रङ्ग चोरिदिएपछि, भएँ–

चरी म बिचरी ।

विश्वासको एक झुण्ड बादलमा

बाजको साम्राज्यले

घातमा बिछोड सिम्रिक मिराज बनाउदैँ

त्यागी रातो रङ्ग लुटिदिएपछि

खुशियाली हरियोबाट

सत्यताको निलो रङ्ग पखालिएर

पहेँलो भएको जिन्दगी हराउदा, भएँ–

चरी म बिचरी ।

अझ पनि हारेरपनि जितको पहिचान स्थापित गर्न

कालो जस्तै लाग्ने गाढा निलो क्षितिजमा

न्यायको बैजनी रङ्ग प्राप्त गर्न–

स्वच्छ÷सफा सेतो माया पाउन–

चोरिएको इन्द्रेणी रङ्ग खोसेर लिन–

फेरि एकपटक,

स्वप्निल पङ्खको भर उडान भर्न थालेकी छु –

चरी म बिचरी ।

हेटौंडा–१

लेखकका अन्य रचना पढ्न यहाँ क्लिक गर्नुहोस ।