19 वर्षदेखि निरन्तर
समकालीन साहित्य
समकालीन साहित्य
हाँस्छन् सूर्य मुसुक्क पूर्व नभमा सिन्दूर रातो छरी
बस्छन् चन्द्र मुहार उज्वल गरी त्यो श्वेत आभा छरी ।
यो राम्रो नव रूप हेर्छ पहिले झापा बसी पूर्वमा
पूर्वी द्वार भनेर चिन्छ सबले जिल्ला छ मैदानमा ।।
१
काला कानूनका विरुद्ध पहिलो विद्रोह जन्म्यो यहीं
गर्दै क्रान्ति लडे युवा अघि बढे उद्वेग फैल्यो यहीं ।
झापाको शिरमा इलाम नगरी छाता बनी उत्तर
शोभा दिन्छ सुरम्य फिक्कल सँगै श्री अन्तुले सुन्दर ।।
२
पूर्वी भाग छ भारतीय बिचमा मेची नदी बग्दछिन्
किल्ला दक्षिणको बिहार यसको सीमाहरू स्तम्भ छन् ।
मावा पर्दछ पश्चिमै तिर नदी जिल्ला छ यो मोरङ
यो भोगोलिक ठाउँ हो छ रसिलो झापा सधैं सुन्दर ।।
३
बग्छिन् दक्षिण शुद्ध आशिष दिंदै कन्काइ(माई) नदी
जिल्ला भित्र छ देवतीर्थ रसिलो बस्छन् यहाँ शम्भु जी ।
हानी वाण दिएर पूर्ण जलका धारासँगै अर्जुन
सेवा गौकन गर्दथे छ उनको सत्कीर्ति नै सुन्दर ।।
४
मारेथे अघि भीमले बल गरी यो क्षेत्रमै कीचक,
प्रख्यातै छ यहाँ पवित्र जल छन् क्यै मिल्छ खोजे अझ ।
होचो ठाउँ छ देशको तलतलै हो केचना दक्षिण
तीर्थस्थान छ कोटिहोम नजिकै माई नदी पश्चिम ।।
५
अर्को तीर्थ छ देव धाम सबले भन्छन् सतासी यहीं
कालीस्थान प्रसिद्ध तीर्थ छ बुझौं पर्दैन जानैं कहीं ।
ठूला छन् सहरै यहीं वरपरै राम्रो छ बस्ने स्थल
अड्डा छन् सब एक ठाउँ नजिकै पर्दैन जानै पर ।।
६
बिर्तामोड शनिश्चरे अनि धुलाबारी र मेची न.पा.
बस्छन् चन्द्रगढी सँगै दमकमा मान्छे अनेकौं यता ।
पैले चन्द्रगढी थियो अब हट्यो जिल्ला मुकामै यता
दोश्रो नाम जुरेर भद्रपुर भो फेरेर नौला लता ।।
७
जिल्ला भित्र प्रसिद्धि प्राप्त नगरी धेरै भए तापनि
थोरै नामहरू लिपी हुनगयो यो छन्द भाका भरी ।
हाँस्तैछिन् धरती खुला प्रकृतिमा फल्दैछ अन्नादिक
बग्दैछन् जल नित्य बायु रसिलो चल्दैछ ढाक्तै पथ ।।
८
यस्तै सुन्दर रूप भित्र दुलही बन्दैछ झापा सधैं
हेरौं सुन्दर रूप मुग्ध मनले आएर यो पूर्व मैं ।
गर्छाैं स्वागत मित्र भाव मनले सद्भाव सद्भावमै
बाँडौं प्रेम मिलेर आपस सधैं बन्धुत्वको भावमै ।।
९
भद्रपुर–१४(चन्द्रगढी)