14 वर्ष देखी निरन्तर
समकालीन साहित्य

म वाकरूद्ध भएको छु

कविता बैद्यनाथ उपाध्याय November 20, 2015, 3:22 am
बैद्यनाथ उपाध्याय
बैद्यनाथ उपाध्याय

मान्छे भनिरहेछ एकथोक

गरिरहेछ अर्कैथोक

उ जे भनिरहेछ

त्यो अर्थ बुझाउन

आज शब्दहरू अक्षम भएका छन

उसको भन्नुमा, गर्नुमा

र हाम्रो बुझ्नुमा

जुन फासला छ

भाषा अब त्यो पुरा गर्न

नसक्ने भएको छ।

उ जे भनिरहेछ

सही अर्थमा

त्यो नै भनिरहेको छैन

त्यसमा धेरै किन्तु, परन्तु

इत्यादि मिसिएका छन।

समग्रमा उसको भन्नु

उसको गर्नुको बीच

अंध्यारा पाटाहरू भरिएका छन

बाहिर आफुलाई

चम्काउने प्रयास गरिरहेछ

तर भित्रबाट सडेको दूर्गन्ध फैलिरहेछ।

यो स्थितिलाई

म आज के अभिव्यक्ति दिऊँ

म अवाक छु

म वाकरूद्ध भएको छु।

लेखकका अन्य रचना पढ्न यहाँ क्लिक गर्नुहोस ।