14 वर्ष देखी निरन्तर
समकालीन साहित्य

बाध्यता

कविता जेबी खत्री December 24, 2015, 2:07 pm
जेबी खत्री
जेबी खत्री

योग्यताका

प्रमाण पत्रहरू

खातैखात

एउटा बलियो

कन्तूरमा कैद गरेर

परदेशिएको मन

फर्केर आएन ।

बिचरा जाँदै

सपनाको भारी

बोकेर गएथ्यो ।

आफन्तको अनुहारमा

उज्यालो खोज्न

आँखाभरि

आसँु पारेर

बाटो लागेथ्यो ।

देशको मायाँले

बाँच्न नसकेर

परिवारको आसँु

नाँघेर गएथ्यो ।

मुहारमा खुशी भर्न

आफूले खाने थाल जस्तो

खेत बेचेर

डाँडाको घाम जस्ती आमा

जून जस्ति जीवनसङ्गी र

तारा जस्ता बालबच्चाहरू

घरमा छोडेर गएथ्यो ।

धेरैपछि ऊ आयो ।

आउन त आयो ।

तर सन्दूकमा

कैद भएर आयो ।

कसलाई के भनौं

विदेशिनु उसको रहर थिएन ।

बाध्यता थियो ।

लेखकका अन्य रचना पढ्न यहाँ क्लिक गर्नुहोस ।