14 वर्ष देखी निरन्तर
समकालीन साहित्य

विश्व मानव चे

कविता कुमार काफ्ले March 18, 2016, 4:25 am

एउटा देशमा तिम्रो नाभि गाडिएको छ

त्यहीँको माटो सुँघेर हुर्केका तिमी

अर्कै देशको भूमिमा प्रशिक्षित भइ

विभिन्न देशको माटोमा,

पहाड र बस्तीहरूमा

अथक युद्ध गर्ने,क्रान्तिको बीउ छर्ने

र अर्कै मुलुकमा गई रगत र पसीना बगाउने

प्राणाहुति गरि शहादत प्राप्त गर्ने महामानव अर्थात विश्वमानव हौ तिमी।

विश्व मानचित्रको अर्जेन्टिनामा

प्रादुर्भाव भइ क्यूवाका पहाड र मैदानहरू

सियरा माइस्त्रा र सान्ता क्लाराहरूमा

तिमीले बिताएका सन्त्रासमय क्षण

र उतारचढावहरू

मृग झैं उफ्राइ र दौडाइहरू

तानाशाही बतिस्ताका विरुद्ध

शरीरमा दम र हातमा एम वान बोकेर

कोनराडका शिखरहरू चढ्ने

महान् योद्धा चे!

मुटु हत्केलामा राखी

आफ्नी सानी छोरी र जीवनसंगिनी हिल्डासित विदाइ पत्र लेखेर

युद्धमा होमिएका महान् विचारक चे

युद्ध विजेता भइ राज्यको सुखभोगको

किञ्चित लोभ नगर्ने मन्त्री चे

कंगोमा क्रान्तिको वीजारोपण गरि

सिमोन बोलिभारको प्यारो देश बोलिभियामा

छापामार युद्ध लड्ने प्रिय चे

त्यही देशमा शहादत भइ माटोमा मिल्ने

र पुन: उठ्ने कंकाल बनी

त्यो कंकाल,त्यो माटो,त्यो तस्वीर

धन्य छ जुन क्यामेराले तिम्रो

तस्वीर खिच्न पायो

पवित्र छ त्यो माटो जहाँ तिम्रा पाइलाको स्पर्श भयो

तिमी हिँडेको बाटो अनि

तिमीमाथि हिँडेको बाटो

कठिन छ तर असंभव छैन

खाँचो छ केवल तिम्रै जस्तै

साहस र नीर्भिकताको।

प्रिय चे!

मलाई तिम्रो बारेमा अझ धेरै पढ्न मन छ

अझ केही लेख्न मन छ,बोल्न मन छ

तर तिम्रो बारेमा म भन्दा धेरै पढ्ने

लेख्ने र बोल्नेहरूको भीड छ

यद्यपि तिम्रो पदचाप पछ्याउनेको कमी छ

किनकि तिमी महामानव हौ

कुनै देशको सिमानाले तिमीलाई

तिम्रो विचारलाई, तिम्रो संघर्षलाई

रोक्न सकेन,

रोक्न सक्दैन

किनकि तिमी विश्व मानव हौ।

ओखलढुंगा

लेखकका अन्य रचना पढ्न यहाँ क्लिक गर्नुहोस ।