17 वर्षदेखि निरन्तर
समकालीन साहित्य
समकालीन साहित्य
आउ नयाँ वर्ष आउ,
स्वागत छ तिम्रो,
आतुर छु म
नयाँ पात्रो फेर्न।।
अनुरोध छ,
धेरै आशा र बिश्वास लिएर आउ
कहिल्यै नटुट्ने आस्था र भरोशा लिएर आउ
संक्रमित् छन् मान्छे यहाँ उही पुरानो रोगले
सक्छौ दिर्घबुटी लिएर आउ,
अहमताको रोगले ओछ्यान परेका छन् महाराजाहरु
आफ्नै प्रतिज्ञाले थिचिएका छन् भिष्म पितामहहरु
अर्जुन र कृष्ण कै, महाभारत चलेको बेला।
आउ नयाँ वर्ष,
खुशी छु म तिम्रो स्वागत गर्न पाउँदा
बिचारहरु छरिएका छन् उदेश्य एउटै भएपनि
त्यसैले अलिकती उज्यालो लिएर आउ,
बिशेष बिन्ती छ मेरो
बाचा पुरा गराउने परम बुटी लिएर आउ
लिस्नाहरु भात्किएका छन् यहाँ
केही खुड्किलाहरु लिएर आउ,
शिंह दरबार र बस्तिको दुरी बढेको छ
नयाँ साल जस्तै नयाँ अभियान लिएर आउ
शिंह दरबारको पारीलो घाम बस्ती पुर्याउनु छ
शन्त साधुहरु सैतान निस्कन थाले
केही बाँकिरहेका बुद्धत्वका उपदेश लिएर आउ
सिद्धान्तहरु त निख्रिसके दस्ताबेजहरुका
सक्छौ राता पहेंला ठेलिहरु लिएर आउ
आउ नयाँ वर्ष, तिम्रो आगमनमा खुशी छु म।
राजमार्गहरु प्यासी छन् आजभोलि
सिङ्गै गाउँ र बस नै पिए पनि
त्यसैले त्यो प्यास मेटिने जडिबुटी लिएर आउ,
कमजोर छन् सरकार र कुर्ची
मजबुत् कडी लिएर आउ,
एेनका किताबहरु च्यातीसके
गोर्खे लौरो, कानुनको
बलियो छडी लिएर आउ,
त्यती मात्र कहाँ हो र नयाँ वर्ष
परीबन्धका नाकाबन्धीले आक्रान्त छन्
नेपाली अङ्गेनाहरु थोरै आगो लिएर आउ
सुन चाहिंदैन बरु नुन लिएर आउ
बिभेदका खाडल झन गहिरिंदै छन्
खाडल पुर्ने चेतना लिएर आउ।।
अनुरोध त धेरै छन्, नयाँ वर्ष
यसपाली मैले भनेका सम्झिएर ल्याउ
अग्रिम साधुबाद छ ।।