छन्दको फुल

कविता गोपाल ढकाल April 28, 2016, 6:53 pm

---

नयाँ कवितामा

आज कविता कि प्रकृति

युग सापेक्ष र समाजसँग

जोडिएर टाँसिएर गाँसिएर

जीवनानुरूप हिँड्ने गर्छिन्,

वैज्ञानिक र बौद्धिक युग..

अप्ठ्यारो निक्कै अप्ठ्यारो

बन्दैछ, फलतः

नयाँ कवितामा नादको लय हैन

अर्थको लय हुन्छ।

तन्काइने बङ्ग्याइने छन्द हैन

अर्थ भित्र बङ्ग्याइ तन्काइ हुन्छ।

आजको छन्द­­­­

कविता भित्र हुन्छ

छन्दमा कविता हैन

कवितामा छन्द लुकेको हुन्छ।

त्यसैले त छन्द मूक छ।

पङ्गलले सिउरिदिएको फूल

कतै मुर्झाउँछ कतै ओइलिन्छ

कतै झररै सकियो,

नयाँ कवितामा त्यो फूल

‘फुल’ बनेर गुम्सिएको छ

कुनै दिन ‘फूल’ ‘फुल’ बन्छ

निस्किन्छन् अनेकौ चल्ला

छन्दै छन्द बनेर

लयात्मक गयात्मक

पिङ्गलको फूल फेरि फुल्छ

मेरो उद्यानमा

हाम्रो उद्यानमा।

लेखकका अन्य रचना पढ्न यहाँ क्लिक गर्नुहोस ।