14 वर्ष देखी निरन्तर
समकालीन साहित्य

रामेको खोजी हुनपरेको छ

कविता पशुपति पराजुली "सालघारी" October 20, 2016, 1:13 pm

एक दिन हातमा खुकुरी बोकेर

निरङ्कुशताको समाधि गर्न

रामबहादुर सहर पस्छ ।

रामे शान्तिसेनाको योद्धा होइन

रामे लालसेनाको बहादुर पनि होइन

तैपनि

कहिले रगतसँगै सडकमा पोखिएर

कहिले गोली सबै छातीमै थापेर

देशका थुप्रै उडुस उपियाँ मा¥यो उसले

कैयौँ लामखुट्टेहरू पछा¥यो उसले

अनि ऊ लड्दै जाँदा

देश रुपान्तर भयो प्रजातन्त्रमा ।

तर आजभोलि

रामेका आँखाहरू कहिल्यै ओभानो छैनन्

र ऊ एक्लै पिँढीमा बसेर

खाटा बस्दै गरेका डाम र खतहरू सुम्सुम्याउँदै रुन्छ ।

कसैबाट वास्ता भएन उसको

उसको वास्ता हुनुपरेको छ ।

कहिले ऊ पशुपतिमा बटुको थापेर इज्जत फाल्न खोज्छ

कहिले बाग्मतीका किनारमा बालुवा चाल्न खोज्छ ।

आज यहाँ थुप्रै रामे निराश भएका छन्

र कैयौँ रामे हताश भएका छन्

अझै खोजी भएन रामेको

उसको आजै खोजी हुनुपरेको छ ।

रामेका शुभेच्छुकहरूमध्ये

तपाइँहरूमा कोही भए

कहिलेकाहीँ पशुपति जाँदा

मगन्तेहरूको लस्करमा

रामे छ कि भनेर हेर्ने गर्नू

कहिलेकाहीँ खोलाका किनारहरू घुम्न जाँदा

बालुवा चाल्दै छ कि रामे

भनेर खोज्ने गर्नू

उसको बहादुरी

आज घर न थरको भएको छ ।

उसलाई अलिकति

जीविकाको बन्दोबस्त गरिदिनुपरेको छ

उसको परिवारलाई अलिकति

राहतको अनुभूति मागिदिनुपरेको छ

किनभने उसले

प्रजातन्त्रका लागि ठूलो ‘गुन’ लगाएको छ ।

लेखकका अन्य रचना पढ्न यहाँ क्लिक गर्नुहोस ।