सूर्य हराउने गर्छ

कविता दीपक सुवेदी October 27, 2016, 7:37 pm

---

प्रत्येक रातमा सधैँ सधैँ नै

सूर्य हराउने गर्छ

आशाको रङ्ग पोखेर

बिहानै

चुपचाप चुपचाप फेरि

बालकझैँ एक्लै सधैँ फिर्ने गर्छ

प्रत्येक रातमा सधैँ सधैँ नै

सूर्य हराउने गर्छ ।

साँझमा झ्याल ढोका बन्द गरेर

सूर्य

थकित आँखाहरु

बन्द गर्दै

दुई पल्ला जोरेर क्षितिजमा

सूर्य

सुस्तरी सुस्तरी

हिँड्ने गर्छ

प्रत्येक रातमा सधैँ सधैँ नै

सूर्य हराउने गर्छ ।

अनिँदा आँखा लिएर

साक्षी राखेर कुखुरी काँ

फेरि बिहानै

चुकुल र आग्लाहरु खोल्न आइपुग्छ

रातमा स्तब्ध भएका धुनहरु

विद्रोहमा रुपान्तरण गर्दै आइपुग्छ

रातमा निसासिएका चिरागहरु

फूलाउँदै आइपुग्छ ।

प्रत्येक रातमा सधैँ सधैँ नै

सूर्य हराउने गर्छ ।

प्रत्येक रातमा सधैँ सधैँ नै

सूर्य हराउने गर्छ ।

आशाको रङ्ग पोखेर

बिहानै

चुपचाप चुपचाप फेरि

बालकझैँ एक्लै सधैँ फिर्ने गर्छ

प्रत्येक रातमा सधैँ सधैँ नै

सूर्य हराउने गर्छ ।

गौरादह, झापा

लेखकका अन्य रचना पढ्न यहाँ क्लिक गर्नुहोस ।