14 वर्ष देखी निरन्तर
समकालीन साहित्य

एक कट्ठा जमिन र तीन तोला सुन

कविता यादव अधिकारी December 23, 2016, 8:32 am

भो छोड अब बुद्घको अभिनय गर्न

हिंसाका पर्याय तिमी

समयले पोल खोली सकेको छ ।

डोकोले छोपेका सेता परेवाहरु

पखेटा फिँजाएर स्वाच्छन्द उडिसके

तिम्रा झुटलाई पत्याउन

विश्वासले उल्टो पाइला कहाँ चाल्छ र ?

तिम्रो बर्बर खलनायकीमा

मन मष्तिस्कका चोटहरु

विर्सनै पो कस्ले सक्छ र ?

रगतको खोलामा तौरिरहेका सेता चादरहरु

समयलाई कैद गर्ने तिम्रो दुश्साहसका अहंहरु

बन्दुकको उन्मादमा निस्केका काला रसायनहरु

हाम्रो विश्वासको पहाडलाई कहाँ गाल्छ र ?

र अझै पनि एक अनुन्तरित प्रश्न

लुटेका बैँकहरु, भुटेका शिक्षक र कर्मचारीहरु

खलियानको धानहरु, छिमेकमा बेचेका तिम्रा अभिमानहरु

राज्यबाट लुटेका धनहरु, सिउँदो पुछेका तनहरु

क्यान्टोनमेन्टका चेकहरु, सुमार्गीका भरथेगहरु

तिम्रा सन्तानका विलासी जीवन शैलीहरु, आफन्तलाई बाढ्ने थैलीहरु

साँच्चै एक कट्ठा जमिन र तीन तोला सुनकै अवयव हुन्

वा अरु कुनै अदृश्य रत्यौलीहरु ??

गौरादह, झापा

लेखकका अन्य रचना पढ्न यहाँ क्लिक गर्नुहोस ।