14 वर्ष देखी निरन्तर
समकालीन साहित्य

आत्महत्याको परिवेश

कविता श्रवणकुमार ढुंगाना January 26, 2017, 1:25 pm
श्रवणकुमार ढुंगाना
श्रवणकुमार ढुंगाना

आकांक्षा अंकुश बनेर

असफलताको डोरी झुन्ड्याउँदै

आत्महत्याको शुभ-साइत पर्खिरहेछ

परिवेश

अवसरको सुर्कने-गाठो पारेर

जिजिबिसाको गला दबाउने उत्सवको प्रतिक्षामा छ,

जब यी नै छिमेकी हुन्छन्

जब यी नै प्रीयसी हुन्छन्

हृदय भुसको आगो

जिन्दगी धुवाँ धुवाँ हुन्छ ।

ईश्वर दागा धरेर बसेकोछ

दुई घुट्की पानी पिउने सपना देख्नेको भाकल सम्झेर

यता अर्को घुट्की प्यास अधुरै छ !

यो पानीको जलन, र

यो भाकलको घुटन

भलै यहाँ मृत्यु मुस्कुराएको छैन, तर

जिन्दगी ओभाएको पनि छैन !

टाढा टाढासम्मका उज्याला किरणहरू

द्रुत गतिमा

ख्याक रङमा मेटामर्फोसिस हुँदैगएका छन्

टेकेको जमिन भासिदै गएकोछ

उद्दारमा आएका हातहरू

चक्कु, चुलेसी र करौंती जस्ता !

सहानुभूतिका बाढि

यो एकलासको टापुमा अाइपुग्दा

सरकारी राहत जस्तो थोपा

आँखाबाट बगेरै सकिएको छ ।

रातको साम्राज्य छ

सर्प, धनुष र बिरालो शासकहरू !

ऊनिहरू

सर्प नचाउनेहरू,

ताँदो चढाउनेहरू र

बिरालो खेलाउनेहरूको ईशारामा

यो जंगलको आतंकपूर्वक संरक्षणमा जुटेका छन् !

मुस्कुराइरहेकाहरू ढाड तिरबाट

डराइरहेकाहरू कोखा तिरबाट

निदाइरहेकाहरू गला तिरबाट

आक्रमणको शिकार भएका छन् !

जीव बधशालामा-

मरेका कुखुराको मोलमा बिक्रीमा छ

हत्या आत्महत्याको अपराधमा दर्ता छ

आत्महत्या हत्याको अभियोगमा प्रताडित छ

दुर्घटना शहीदको मानमर्दनमा सम्मानित छ !

मस्तिष्कमा दिगमिग-दिगमिग

मनमा भय अनि अवसाद

आँखामा अन्धकार

ब्यवहारमा अबिश्वास

समय आत्मको हत्यामा उद्धत छ !

आकांक्षा अंकुश बनेर

असफलताको डोरी झुन्ड्याउँदै

आत्महत्याको शुभ-साइत पर्खिरहेछ

परिवेश

अवसरको सुर्कने-गाठो पारेर

जिजिबिसाको गला दबाउने उत्सवको प्रतिक्षामा छ ।

लेखकका अन्य रचना पढ्न यहाँ क्लिक गर्नुहोस ।