14 वर्ष देखी निरन्तर
समकालीन साहित्य

सहन्दैछु काका

कविता जिग्मी डी. भोटिया February 23, 2017, 2:07 pm

अइय्या, दुख्यो काका!

चोट मुटुको माझमा लागेर होला

साह्रै दुख्यो

तपाईंको हान्ने बानी

मेरो सहने

तपाईंको रहर

मेरो कर

तपाईंको इच्छा

मेरो बाध्यता

तपाईं उठ्नु

म झुक्नु भएर होला

तपाईं ब्युझँदा

म निदाउँदैछु।

"हिजो मात्र हो

सानो जीवको

असाध्य माया लाग्छ-

भन्दै हुनुहुन्थ्यो-

अलाउट लगाउँदै"

हामीले थप्पडी नमारी हुँदैन।

तर काका…,

हामी छौं तल

र नै तपाईं उचाई नाप्नु हुँदैछ

हामी छौं तल

तब पो तपाईं झट्टारो हान्नु हुँदैछ

अलिक ओरबाट

रत्तिभर मात्र उक्ल्यौं भने त

टुट्ने-फुट्नेकुराहरू धेरै देख्दैछु

साँच्चै काका...,

घर त तपाईंको काँचकै देख्दैछु।

लेखकका अन्य रचना पढ्न यहाँ क्लिक गर्नुहोस ।