14 वर्ष देखी निरन्तर
समकालीन साहित्य

हराएको कविता

कविता गोपाल झापाली August 28, 2017, 2:34 am
गोपाल झापाली
गोपाल झापाली

धेरै भयो परेलीको दैलो नटेकेको

हृदयको जंघार नतरेको

मदिराको मस्त मातका प्यालाहरुमा आउदिनौं

एकान्तको सुस्केराहरुमा पनि छाउदिनौ

सहरमा खोजेको त धेरै भयो, पाईन ।

गाउँको कञ्चन बतासमा पनि आउदिनौ

गिदिलाई उधिन्दा उधिन्दा थाकिसके,

मनलाई निचोर्दा निचोर्दा हारिसके ।

कहाँ हरायौ कविता ?

धेरैले सोध्छन् तिम्रो बारे

तिम्रो र मेरो सम्बन्ध बारे

एक्लै एक्लै म च्यापुमा हात लाएर घोरिँदा

पैतालाले घिसारेको ज्यान गल्लिमा टहलिँदा

म आँफैलाई थाह नभएको साईनो

तिम्रो र मेरो सम्बन्धको लक्ष्मणरेखा

कसरी बुझाउँ मलाई सोध्नेहरुलाई

मेरो साथमा तिमि खोज्नेहरुलाई ?

साईनो खोज्न शव्दकोष धेरै पल्टाई सकेँ,

डाटा किनेर मोवाईलमा गुगल सर्च गरि सकेँ ।

कहाँ हरायौ कविता ?

‘एसट्रे’ बाट उड्दै गरेको धुँवामा,

धुरीबाट चुहिएका तप्केनीहरुमा

बैशालू बतासका पिठ्युहरुमा

बाढिले उठिबास लगाएको उराठ बस्तिमा

जूनको चहक र ताराको चमकमा

कहाँ मात्र खोजिन मैले ।

सम्झि सम्झि खोजँे, बिर्सि बिर्सि खोजेँ

भो अब आउनु पर्दैन

मेरा पछि धाउनु पदैन ।

बरु, साँच्चै भन त मलाई

कहाँ हरायौ कविता ?

दमक

लेखकका अन्य रचना पढ्न यहाँ क्लिक गर्नुहोस ।